Progjet Mape Interative di Tisane

Profondiment

La plante di Antonio Banchieri si compon di siet sfueis. A son stâts tacâts adun su la tele grese, suntun telâr di len (cm 62 x 83). La tele e cualchi tocut di cjarte a son fissâts sul ôr cun clauts di metal. Tal mieç si rapresente Tisane cemût che e jere une volte, cu lis ativitâts comerciâls dal Puart de Ete di Mieç. La famee Banchieri e vignive di Feltre. Il cognon al sugjerìs che i siei vons a fossin banchîrs, salacor di origjin ebraiche. L'autôr nol è un artist di mistîr, ma forsit un apassionât locâl, o un avocat, amant de poesie e de art.

Banchieri si rifâs a un rilêf fat tal 1746 dal perît Antonio Antonelli, che al voleve fissâ i confins e butâ jù un catastic par valutâ il valôr de tiere. A pet dal dissen di Antonelli, conservât te Biblioteche civiche "Joppi" di Udin, alc di diferent al è, sedi pe ete che pes finalitâts: di fat, Banchieri al ilustre la vitalitât dai lûcs cun detais une vore fins e cun personaçs. Di Antonio Antonelli e je ancje la plante che e ripuarte la Braida detta Brolo in Rocca di Cà Capello, cul convent des muiniis e la Roche. Cheste plante e je publicade in Storia e Arte del Septifanium di Latisana di Vinicio Galasso, Latisana, 2010", a pagjine 156.

Une altre plante topografiche di Tisane, par cure di G. B. Garlato, e ripuarte il jet antîc dal flum Tiliment e la linie fin dulà che a rivavin lis cjasis. Dilunc dal Borgo Rocca e de Place a son segnâts i puartis. Daûr dal edifici indicât tant che "Casa Gazzola" (n. 25 te plante di Banchieri) e je rafigurade la Roche viere, che no je te mape di Banchieri. La plante di Garlato e je publicade in Latisana e il suo distretto. Notizie storiche, statistiche ed industriali, Venezia, 1858.

Profondiment

Te rapresentazion, a son tancj i esemplis di architeture spontanie e di influence veneziane. In plui dai palaçs nobiliârs, a son cjasis contadinis cun scjalis esternis e cuviert di paie, e edificis agricui cun arcs grancj. Cualchi edifici al à la forme di tronc di coni tipiche de citât di Vignesie e de lagune. Ancje i zardins, lis corts internis e i orts a son rapresentâts cun grande cure. Cjampituris di colôr neri a rindin la profondiât; in cualchi câs la ombre par tiere e je plui evidente. Invezit, la aghe dal flum e je piturade cun trats di colôr plui scûr.

Personis su lis rivis dal flum Tiliment

Dongje de rive, pôc di là dal Pas (6), e je une çate che e traspuarte caratei. Al è cualchi marinâr suntune barcje che e à doi arbui, salacor une tartane, ancorade, cu lis velis fatis sù e cuntune barcjute peade a gavon. Sul Pas (6), tal mieç dal flum, si traspuarte un cjar cui cjavai. La çate e je vuidade dal passador, che al è daûr a tirâ la cuarde par passâ di une rive a di chê altre. Une imbarcazion cu la vele cuadre spleade e je daûr a traspuartâ marcjanzie e e navighe dilunc dal flum, de bande çampe de plante. Inte chê altre rive, dongje di Ca' Mocenico (3), suntune barcje piçulute, a son personis. Chest al è un pas secondari. Di là dal Pas (6), dongje di une çate cun trê caratei e de rive che e à grancj dipuesits di legnam, un om cuntun baston e une cosse sù pes lis spalis al è daûr a fevelâ cuntune altre persone. L'om al à bregons e cjalcis, gjachete e un cjapiel scûr tarondât cun alis largjis. Pôc plui in là, doi çatârs a traspuartin un cjar rustic suntune çate a cuatri tamons. Une tierce persone e je su la rive, dongje dal ancorament.

Personis pes stradis, e animâi

In place, Piazza (37), dôs personis a cjaminin dongje de Glesie de S. Crôs (38): une e je vistude di scûr, chê altre di clâr. A àn ombrenis e cjapiei scûrs cun alis largjis. Dongje de Glesie de S. Crôs (38), un carocîr al vuide une caroce tirade di une cubie di cjavai. Pôc di là de plaçute, Piazzetta (48), une femine cuntune cite te man e sta su la banchine di len, ad ôr dal flum. Dongje dal Pas (6), un om e une femine a puartin sù pes spalis il buinç cun doi seglots pe aghe. In bas, dongje de jentrade de Glesie di S. Michêl (5), a son un om e une femine. Pe Strade de Sabionere (10) a son dôs personis cun vistîts luncs clârs; pal caratar dal lôr vistiari, a somein orientâi. Dongje di lôr, su la Strade de Sabionere (10), al è un cjan. Invezit, intal parc di Ca' Mocenico (3) a son doi pavons.

Profondiment

PRIME COLONE: DAL 1 AL 6

1. Roggia e strada per S. Giorgio (Roie e strade par S. Zorç)

Vuê, Strade provinciâl 73.

2. Donacis

Famee atestade dal secul XVII.

3. Ca' Mocenico (Cjase Mocenigo)

Famee jusdicente antighe che il so palaç al jere za esistent tal 1599. A man drete e a man çampe dal palaç a son dôs barcjessis dal secul XVII, assegnadis al architet Baldassare Longhena.

4. Strada Pubblica (Strade publiche)

Cumò Vie Carlo Ivancich.

5. Chiesa di San Michiele (Glesie di S. Michêl)

Une glesie dedicade a S. Michêl e je atestade tal 1518. Tal Nûfcent e je stade costruide une gnove parochiâl sul lûc di une glesie plui antighe. Danezade te prime vuere mondiâl, e je stade distrute te seconde vuere mondiâl.

6. Il Passo (Il Pas)

Il Pas al è il pont di passaç dal flum Tiliment di une rive a chê altre pal traspuart di personis, animâi e marcjanziis.

SECONDE COLONE: DAL 7 AL 12

7. Bonis

Une famee clamade cussì e je atestade a Tisane tal secul XVII.

8. F.^e Tagliamento (flum Tiliment)

Al è il flum plui impuartant dal Friûl e al à segnât, tal ben e tal mâl, la vite di Tisane. La plante di Antonio Banchieri e permet di osservâ la vivacitât des ativitâts dal puart fluviâl antîc di Tisane, documentât dal 1226.

9. Chiesa e Con.^to delli RR PP di S. An.^io Sab. (Glesie e Convent dai fraris di S. Antoni di Sabionere)

La Glesie e il Convent dai fraris di S. Antoni, nomenade prime “Glesie di S. Marie de Sabionere”, e dopo “Glesie de Beade Vergjine des Graciis”, e jere stade costruide tal 1578. Il convent francescan dongje al jere stât fondât tal 1638 pe iniziative dal frari Vincenzo Mocenigo.

10. Strada della Sabbionera (Strade de Sabionere)

Il non Sabbionera al è atestât tal 1519. Si riferìs a terens o a une zone cu la tiere pal plui savalonose e di colôr scûr.

11. Fabbriche Suzzi

Il tiermin fabbriche si riferìs a “edificis”. I Zuzzi a jerin origjinaris di S. Michêl. Tal secul XVIII, la Republiche di Vignesie ur à dât il titul di “conts di Roverbasso e Restegliuzza”.

12. Valentinis

Famee jusdicente antighe: i Valentinis di Tisane (principi dal secul XVIl) a son stâts un ramaç dai Valentinis origjinaris di Aquilee e traplantâts a Udin tal secul XIII. A vevin bens e cjase dominicâl a Roncjis e a Vignesie. A àn vût une sente intal Consorzi dai nobii Jusdicents dal feut di Tisane.

TIERCE COLONE: DI 13 A 18

13. Borgo di Sottopovolo (Borc di Sottopovolo)

Sottopovolo al vûl dî, in maniere leterâl, “sot dal pôl” (dal venit povolo). Al ricuarde la usance che a vevin te Ete di Mieç i cjâfs di famee di dâsi adun sot di un pôl. Al jere un Comun aministratîf rurâl distint dal Puart di Tisane. Nomenât tal 1546, il borc si disvilupave dilunc di chê che vuê e je Vie Sottopovolo.

14. Loggia Pubblica (Loze Publiche)

Al jere l'edifici là che si deve adun la assemblee dai cjâfs di famee, la vicinia, par decidi sui diviers problemis aministratîfs dal comun. E je stade la sede de Municipalitât sot dal domini austriac insin al 1897.

15. Strada dietro Chiesa (Strade daûr de Glesie)

La denominazion e je une vore antighe. Intun document dal 1547 il lûc al è segnât tant che Post Gesia. Dopo al è deventât In loco dopo chiesa, Drio Chiesa di S. Zuanne, Drio Chiesa, Drio Cesa.

16. Chi.^sa Abb.^le Parr.^le di S. Gio.ⁿⁱ Bat.^ta e Can.^ca dell'Abbate (Glesie Abaziâl e Parochiâl di S. Zuan il Batist e Canoniche dal Abât)

La prime atestazion de Glesie Abaziâl Parochiâl di S. Zuan il Batist e Canoniche dal Abât e rimonte al 1368. Tal 1504, la glesie e je stade dal dut modificade. Tor il 1750 l'architet lombart Luca Andrioli le à ristruturade.

17. Strada Pubblica di Ronchis (Strade publiche di Roncjis)

E je la Vie Egregis Gaspari di vuê, dedicade ae nobile Rosa de Egregis, vedue Gaspari, muarte tal 1888. E veve lassât une donazion consistente par costruî l'asîl infantîl, che cumò al è la scuele de infanzie che e puarte il so non.

18. Contrada d'Osoppo (Contrade di Osôf)

La contrade e jere dongje dal plaçâl Osôf di vuê. La denominazion e comparìs tal 1573 riferintsi a dut il borc: In Osophio portus Latisanae. E ven nomenade ancje par furlan: Braida in Osôf.

CUARTE COLONE: DAL 19 AL 24

19. Chi.^sa e Con.^to delle R.R.^e M.M. di S.ⁿ Antonio (Glesie e convent des muiniis di S. Antoni)

La storie de glesie di S. Antoni di Padue, costruide par volontât dal mecenat tisanot Gasparo Morossi, fin al 1810 e je stade leade cun chê dal Munistîr, o Convent des muiniis francescanis. Tal 1733, il convent al jere deventât di clausure. I tisanots a àn simpri vût un grum di afiet par chest lûc di preiere.

20. Borgo delle Monache (Borc des Muiniis)

Il borc al jere te strade che vuê e je Vie Carlo Goldoni. La denominazion e ven dal fat che, insin ae fin dal Votcent, la strade e conduseve te Glesie di S. Antoni di Padue, tacade dal convent des muiniis francescanis.

21. Chiesa e Convento de R.R.ⁱ PPⁱ di S. Ago.^no (Glesie e convent dai fraris agostinians)

La glesie di S. Antoni Abât e il convent agostinian a son atestâts tal 1466 e tal 1486. Il convent al jere stât fat sù tai prins agns Otante dal secul XV par volontât di Zaccaria Vendramin e de sô femine Clara Capello. Tal 1769, il convent al è stât sierât de Republiche Venite e subit dopo assegnât par ûs civîi. Tal 1806, si doprave la glesie tant che dipuesit. Il complès, vendût ai Gaspari tal 1917, al è lât distrut cuntun fûc.

22. Borc di S. Antoni

Il borc al è documentât tal 1572: In burgo S. Antoni versus porta Sancti Ioanis. La puarte di S. Antoni e jere une des dôs puartis che a permetevin l'acès tal borc medievâl, ae fin di chê che vuê e je Vie Vittorio Veneto. Chê altre e puarte, o ben chê di S. Zuan, e jere tra il principi di Vie Vendramin e Place Garibaldi..

23. Strada della Annunziata (Strade de Anunziade)

E je la Calle della Annunziata di vuê, documentade tal 1835 tant che Strada com. dell'Annunziata. La denominazion e ven de presince di une glesie dedicade ae Madone Anunziade. E rimonte al 1657, e e je stade sierade tai prins agns dal '900.

24. Casa Colonna (Cjase Colonna)

E je une famee patrizie romane, atestade a Tisane tal secul XVII.

CUINTE COLONE: DAL 25 AL 30

25. Bovaria Cappello

Il tiermin Bovaria, che al ven di boarìa, al vûl dî "une grande aziende agricule". I Cappello a son stâts une famee patrizie veneziane. A Tisane, la lôr presince e je documentade tal secul XVIII.

26. Borgo di Rocca

Il borc al jere dilunc de Vie Rocca di vuê. Al è atestât tal 1543 In loco dicto la de la Roccha. Rocca e jere il non dât a une tor costruide tal secul XIV par difindi il paîs di Tisane. Al jere plui o mancul ae fin di chê che cumò e je Vie Rocca. La roche e je stade distrute te jentrade dal secul XVI.

27. Canevon

Canevon al è un tiermin che in venezian al vûl dî "une grande cjanive".

28. Zaffi

La denominazion di chest edifici si riferìs salacor ae famee Zaffi, un cognon presint in Toscane e Emilie-Romagne; o pûr, ae residence dai zaffi, o sedi lis vuardiis che a jerin al servizi dal tribunâl feudâl. A son nomenâts intun procès de Incuisizion fat a Tisane tal 1591.

29. Ca' Minotto (Cjase Minotto)

Famee patrizie veneziane che e à vût possediments feudâi a Tisane. E faseve part dal Consorzi dai Jurisdicents tal secul XVIII.

30. Ca' Molin (Cjase Molin)

Famee patrizie veneziane, presinte a Tisane tal secul XVII. E faseve part dal Consorzi dai Jurisdicents. Palaç Molin, deventât plui tart Molin Pittoni Vianello, al rimonte al secul XVII.

SESTE COLONE: DAL 31 AL 36

31. Taglialegne

Famee atestade a Tisane tal secul XVII. Tal 1810 e devente proprietarie dal palaç che al jere dai Vendramins.

32. Cà Bernardo (Cjase Bernardo)

Famee patrizie veneziane, presinte a Tisane intal Consorzi dai Jurisdicents tal secul XVI.

33. Donatis

Donatis o Donati: famee origjinarie di Orio, intal bergamasc. E je documentade a Tisane tal secul XVIII.

34. Caprilio

Caprilio o Caprileo: famee atestade a Tisane tal secul XVI. A jerin avocats e nodârs.

35. Morossi

Famee origjinarie salacor di Vençon che si jere stabilide a Tisane tor il 1500. I components di cheste famee a son stâts juriscj, avocats e nodârs.

36. Canelle

Di cheste famee, par cumò, no si àn notiziis. Il cognon al è difondût massime inte aree venete e emiliane.

SETIME COLONE: DAL 37 AL 42

37. La Piazza (La Place)

Vuê si clame Place Indipendenza. Fin te jentrade dal secul XIX si le clamave dome “la Place”. Ae fin dal Votcent, le clamavin Piazza Maggiore, dopo Piazza XX Settembre e in ultin Piazza Roma. La denominazion di vuê e je stade dade dopo de seconde vuere mondiâl.

38. Chiesa di S. Croce (Glesie de S. Crôs)

La Glesie de Sante Crôs, che vuê no je plui, e je documentade tal 1310. Culì, ai 16 di Otubar dal 1368, il popul di Tisane al veve zurât fedeltât al Cont di Gurize Mainart. E je stade demolide tal 1776 adun cul Ospedâl dai Puars, che al jere dongje e che al rimontave al secul XVI.

39. Capitanio

E je la cjase là che al jere a stâ il Cjapitani governadôr dal feut di Tisane. E ven nomenade, cul so cortivo e ort, intal at di division dai fradis Vendramin tal 1528.

40. Grotti

Famee venite documentade a Tisane tal secul XVI (1591).

41. Zoccolari

Famee furlane venite documentade a Tisane tal secul XVIII.

42. Lavezari

Famee presinte a Tisane tal secul XVII.

OTAVE COLONE: DAL 43 AL 48

43. Corradini

Famee venite antighe presinte a Tisane intal secul XVIII.

44. Cagnolini

Famee nobile di Veglia, documentade a Tisane ae fin dal secul XVI. I siei components a jerin esperts di farmacie e di medisine. A jerin atîfs tant che aromatârs ancje tal Sietcent.

45. Grotto

Famee venite. A Tisane e je documentade tal secul XVI.

46. Cà Contarini (Cjase Contarini)

Famee patrizie veneziane. A Tisane, i Contarins a comparissin tant che Jusdicents tal secul XVII (1658).

47. Cà Benzon (Cjase Bonzon)

I Benzons a jerin une famee patrizie veneziane. Al è il palaç de famee Vendramin, puartât in dote ai Contarins tal 1644 e ai Benzons tal 1700. Il palaç venezian, che cumò al è “Palaç Trevisan”, al è stât distrut dai bombardaments tal 1944.

48. Piazzetta (Plaçute)

Apendîs de Place, si slungjave vie tra Palaç Vendramin e Cjase Cappello, fin tal flum Tiliment. Cumò si clame Vie del Battello.

NOVESIME COLONE: DAL 49 AL 54

49. Cà Cappello (Cjase Cappello)

Cjase dominicâl dai Cappello, famee nobile veneziane. A Tisane a son atestâts tal secul XVIII.

50. Tomasini

Famee presinte a Tisane tai prins agns dal secul XVIII.

51. Abbate Morosso (Abât Morosso)

Cjase che e je stade di proprietât dal abât Agostin di Tisane, Carlo Morossi (Tisane 1629 - Vignesie 1713).

52. Beccaria (Becjarie)

Edifici doprât par macelâ i nemâi.

53. Osteria Matassi (Ostarie Matassi)

Ostarie dai Matassi, famee presinte a Tisane tal secul XVII.

54. Ghetto (Ghet)

Edifici là che a jerin a stâ i ebreus a Tisane, presints in maniere stabile dal secul XVI al XVIII. A Tisane, plui che di ghet, si pues fevelâ di une judeche, o sedi de delimitazion di une zone là che a jerin a stâ i ebreus, plui par motîfs di sigurece che no par imposizion.

DECIME COLONE: DAL 55 AL 60

55. Dall'Acqua

Par cumò no si àn notiziis precisis su cheste famee.

56. Rossetti

Famee presinte a Tisane tal secul XVI. Inte scrite, la letare R nol je plui visibile.

57. Bianchini

Famee presinte a Tisane tal secul XIX.

58. Fontanini

Famee presinte a Tisane tal principi dal secul XVII.

59. Amadi

Famee presinte a Tisane tal secul XVIII.

60. Pinzani

Famee presinte a Tisane tal secul VII.

Profondiment

La plante di Tisane di Antoni Banchieri, prime dal intervent di restaur, e jere contignude intune suaze di fate dal Votcent, di len e cul ôr dal veri slissât; e jere picjade intune parêt dal ufici dal Sindic dal Comun di Tisane. La mape e je stade restaurade tra i mês di Jugn e di Avost dal 2022 par cure dal Centro Studi e Restauro Soc. Coop di Gurize. Prime di dut, si è documentât il stât di conservazion origjinâl cun fotografiis; dopo, la suaze e je stade vierte e si è analizade la mape. Cul passâ dal timp, il supuart di cjarte si jere scurît, salacor pal ûs dal adesîf di origjin animâl doprât par tacâ i sfueis di cjarte te tele. Cun di plui, sul sfuei a vevin vût passade vernîs. Il dissen, cjalant ben soredut la part alte a diestre, al veve di jessi stât a contat cun sostancis licuidis, cause de pierdite dal lustri e dal ton cromatic. La vernîs si jere slavade ad implen ingrumantsi intal centri dal dissen, dulà che e veve fat une magle scure. Cheste part dal supuart e veve ancje agadoriis (o ben, maglis a forme di striche). L'ecès di umiditât al pues vê causât il degrât gjenerâl de vernîs presinte su dut il dissen. La vernîs, cuant che e jere daûr a suiâsi, si jere creturade, si che sul supuart di cjarte si viodin ca e là lis mancjancis.

Intal specific, il supuart di cjarte e la tele a son stâts netâts vie dal polvar, e po dopo si ju à mondâts a sec. Si à vude cetante atenzion pai pigments e pes parts plui delicadis, soredut dongje di chês plui fragjilis e dal craquelé. La superficie pitoriche e je stade idratade cuntune soluzion agadose che e à permetût di slargjâ la vernîs e i pigments intes porzions dal supuart che a jerin aromai scuviertis. Si à ripetût cheste operazion fin che si è otignude une percezion omogjenie. Il scuriment de part centrâl al è stât sclarît. Al è stât doprât un adesîf a base di metilidrossietilcelulose 300p in diviersis percentuâls di soluzion agadose, metût jù cu la ponte di un pinel par ritocjâ. Cun di plui, si son fissâts i pigments te zone de leiende, e rinfuarcidis lis parts plui fragjilis ruvinadis dai insets xilofacs. Pes sbregaduris e pes sfonderadis si à doprât vêl e cjarte gjaponese di colôr e gramature adats. Si son fatis zontis une vore precisis, di colôr plui clâr, a acuarel, in corispondence des integrazions di cjarte gjaponese e intes zonis cun difiets di continuitât percetive. De analisi si è podût capî che lis piçulis parts plui claris che si viodevin tal dissen a corispuindin a maglis blancjis di cjalcine fatis in maniere acidentâl. I piçui framents di cjarte veline dilunc dal ôr a son stâts mantignûts parcè che a fasin part de storie dal document: salacor, al podarès jessi un ricalc no resint. La tele e à une funzion struturâl intal mantignî adun i siet sfueis che a componin la plante, duncje no je stade stacade dal telâr par evitâ deformazions e la pussibile pierdite di pigments.

Une volte finît il restaur, il dissen al è stât metût intune curnîs gnove, cul veri museâl realizât a cassele di mût di podê viodi i margjins dal telâr origjinâl. Stant che il document al è cetant delicât, la Sorintendence e à prescrit che la mape no sedi plui esponude in maniere permanente par evitâ i dams provocâts de lûs. I studiôs a puedin consultâle presentant une domande motivade ae Biblioteche comunâl. Par che il public al puedi viodi la imagjin restaurade de mape, tal prin plan de sede municipâl di Tisane, e je esponude une riproduzion a colôrs in scjale 1:1 su cjarte fotografiche, insuazade te curnîs dal Votcent. Cheste curnîs e jere stade prime netade, rinfuarcide e lustrade cu la cere.

Profondiment

Altris fonts bibliografichis:

• Comune di San Michiele al Tagliamento 1807-2007, San Michiele al Tagliamento, Comune di San Michiele al Tagliamento 2007
• Dante canta Latisana, videoregjistrazion fate tal ambit dal progjet "Un anno con Dante", C. BRUGNETTA [regjie], A. FLORAMO [aprofondiment storic], D. DE GREGORIO [improvisazions musicâls], Latisana, Comune di Latisana 2021, [DVD]
• E. FANTIN, Il santuario della "B.V. delle Grazie" di Sabbionera. Le origini e la sua storia, Latisana, la bassa 1996
• E. FANTIN, La Signoria dei Vendramin nella Terra della Tisana: Un anticipato interesse di Venezia per il Friuli, in “la bassa”, 81 (2020), pp. 29-64
• V. GALASSO, Perle d'arte, Latisana, Comune di Latisana 2016
• Latisana e il suo distretto. Notizie storiche, statistiche ed industriali, Venezia, Tipografia del Commercio 1858 (ristampe anastatiche Latisana e il suo distretto, Udine, Ribis 1979)
• Latisana il Segno e il Tempo, Latisana, Comune di Latisana 2001
• M. MONTE, Ebrei e banchi ebraici nella “particolare giurisdizione della Tisana” in età feudale, in “la bassa”, 45 (2002), pp. 29-44
• V. ROGATO, F. ROMANIN, N. TRACANELLI, San Michiele la “Cassino del nord”, Latisana, la bassa 1996
• D. SCIUTO, La pala del Veronese nella pieve abbaziale di Latisana, Latisana, Comune di Latisana 1995
• Schedis di catalogazion dal Sistema Informativo Regionale del Patrimonio Culturale del Friuli Venezia Giulia (SIRPaC)
• R. TIRELLI (par cure di), Una giudecca a Latisana. Mappa, storie, tradizioni, Atti del convegno (Latisana, 4 settembre 2022), Latisana, Comune di Latisana 2023
• A. ZANNINI (par cure di), Un paese, un fiume. Storia di Latisana dal Medioevo al Novecento, Udine, Forum 2020

Profondiment

A Tisane si pues fevelâ plui di “Judeche” che no di "ghet" par vie che i ebreus a dopravin chel spazi plui par sigurece che no par imposizion. I prins insediaments ebraics a Tisane a rimontin ae prime metât dal '500. Salacor a jerin ebreus di origjin aschenazite, rivâts de Europe centrâl e orientâl. Tal 1302, un ebreu, Isak di Lienz, al scuedeve lis tassis pai Conts di Gurize che in chê volte a jerin parons dal feut di Tisane. Te Tisane dal Cinccent, i ebreus a scambiavin e a prestavin bêçs, ma no jerin a stâ dentri dal feut.

I Vendramins che, dopo cualchi passaç di proprietât a vevin cjapât il puest dai Conts di Gurize tal 1457, a garantivin ai ebreus une autonomie discrete tal rispiet di regulis e condotis, un spazi par vivi, e un ambient di pueste par esercitâ il prestit. A Tisane i ebreus a vevin puartât il lôr contribût economic e culturâl. A esercitavin ancje professions che par solit no ur jerin permetudis, par esempli la coltivazion dal forment, l'arlevament di besteam e la viticulture. Un document dal 1528 al fevele di un dazi di siet liris pe becjarie (beccaria) “kosher” dai ebreus; tal 1574 e je documentade la presince di un miedi ebreu. Il puart al garantive une grande mobilitât di personis e par chest si viveve intun ciert pluralisim tra la int locâl e i forescj. I rapuarts cu la popolazion a jerin pal plui di convivence e di confront.

Cemût che al dimostre cualchi document, i ebreus no àn simpri stât a stâ in chest edifici. La presince ebraiche a Tisane e je finide tal 1746: la piçule comunitât e jere lade dispierdintsi, o si jere distudade. Tal 1748, la abitazion indicade te mape tant che “54. Ghetto”, fitade ai ebreus di Francesco Barbarico, e jere aromai vueide; tal 1810, il gnûf proprietari al jere deventât Antonio Paolini. Intal cjast dal edifici, che vuê al è indicât come Cort Chiarcos, cualchi an indaûr a son stâts cjatâts fûr ogjets leâts ae culture ebraiche. Intal puarti, tal an 2020, e je stade metude une epigrafe che e documente la presince inte cort di nuclis ebraics cul banc dai pegns.

Profondiment

I Mocenigo a fasin part des fameis blasonadis venezianis che tal Cinccent tart a formavin il Consorzi dai Jurisdicents dal feut di Tisane. Il palaç Mocenigo al risulte che al fos za stât costruît tal 1599 in ocasion dal matrimoni tra Marcantonio Mocenigo e Bianca Vendramin. Al è logât dongje dal Puart sul Tiliment; il so scheme planimetric al è chel tipic des vilis venitis dal Cinccent. La prime stabilidure di colôr ravost - che i veve dât il non di "Palaç Ros" - le vevin sostituide intun secont moment cul marmorin blanc.

Lis dôs barcjessis che a jerin stadis pensadis tant che cuintis prospetichis, a fasin di suaze al edifici principâl. Realizadis par ospitâ i ambients di lavôr e di servizi dai contadins, a rimontin al secul XVII e a son atribuidis al architet Baldassarre Longhena (1598-1682). Si è fate la ipotesi ancje di altris doi architets: Francesco Contini (1599-1669) e Giuseppe Sardi (1624-1699). Il front principâl al è ritmât di siet arcs poiâts su pilastris retangolârs, dividûts cun intervai regolârs di semicolonis di ordin doric etrusc. A tegnin sù une trabeazion cuntun fregji alt, stramezât di triglifs cun parsore cjâfs di bestiis e barcons elitics cun curnîs a scartòs.

Dopo di un periodi di abandon, Vincenzo Biaggini al veve ristruturât il palaç, tal 1870. Po dopo al è passât di proprietât ae famee Ivancich e al à ospitât personaçs famôs, par esempli Ernest Hemingway. Te prime vuere mondiâl lu dopravin tant che ospedâl di cjamp de Crôs Rosse Taliane e dopo al à ospitât la sede dal comant austroongjarês. Te seconde vuere mondiâl la vile e je stade distrute. Vuê, di dut il complès dal Sietcent, nus restin lis dôs barcjessis ruvinadis e l'oratori di Sant Josef, che salacor al jere stât zontât ae barcjesse de bande Sud a metât dal Sietcent. Intal parc a son vot statuis dal Sietcent che a rafigurin lis stagjons e lis cuatri virtûts.

Profondiment

I Molins a fasevin part dai parons feudâi e patrimoniâi intal feut patrizi di Tisane, che intal so Consorzi a comparissin tant che jusdicents. Cjalant ben il rilêf di Antonio Antonelli dal 1746, il fabricât di man çampe nol à arcs tal plan tiere e si viodin dome doi barcons tal plan parsore. Invezit, Banchieri al rafigure trê arcs taronts a diestre e a çampe, marcjant il fabricât centrâl dal edifici cuntun bugnât angolâr. Vuê la façade che e da su la strade no à plui tal plan tiere i arcs taronts.

In corispondence dal templâr, e dilunc des alis dal cuviert, a son stadis gjavadis vie 12 statuis che a rapresentavin i mês dal an. Tal mieç, parsore dal portâl retangolâr di piere, e je une trifore cun arcs taronts e une balustrade di fier batût. In as a son doi barcons che a àn balustrade e luminarie cun templâr. Dentri, tal prin plan, e je la “Sale dai Stucs”. Tantis curnîs di stuc a fasevin di suaze a oparis che a son stadis pierdudis adun cu la mobilie origjinarie dopo dai sacs di ete napoleoniche e de ocupazion austriache de prime vuere mondiâl.

Intai agns Cincuante dal Nûfcent, il plan tiere al jere la sede dai uficis de pueste; dopo, al è deventât un dipuesit di mobiliis par une buteghe. Tai agns Sessante lu à comprât il Comun di Tisane cun chê di trasferî alì la Biblioteche comunâl, che po e je stade li dome par pôc timp. Vuê, la part centrâl e ospite la associazion Pro Latisana, la Scuele Comunâl di Musiche e l'Ufici di informazions e di acet turistic.

Profondiment

Vuê, l'edifici al à tal centri un portâl di piere cul arc taront, la clâf di volte e je a bovul e une suaze parsore. Adalt, une puarte barcon a bifore cul arc taront e da suntun puiûl. Il palaç al à elements architetonics e une disposizion interne dai ambients tipics dai palaçs venits. Tai secui XVIII e XIX al è stât modificât. Une targhe di bronç metude tal 1900 e ricuarde re Umbert I. A metât dal Nûfcent, tal plan tiere, a man drete, al jere il Caffè Restaurant Centrale, dopo Cafè Veronese.

Tal mieç dal puiûl ancjemò vuê si pues viodi la steme dal Comun di Tisane. Al à doi leons rampants voltâts bande une tor cun rie dople di curmiei di stîl vuelf; in bas e je la scrite "Tisana". Il leon al ricuarde la steme dai Conts di Gurize, che a jerin stâts feudataris de Tiere di Tisane par trê secui. E je la riproposizion di elements presints intal sigjîl dal Tresinte dal Comun dal Puart di Tisane. Di fat, il sigjîl antîc, al rapresente tal mieç une tor cu la rie di curmiei di stîl vuelf, e in bande di cheste a son doi scûts cun dentri un leon rampant indreçât bande la tor. Parsore des stemis a son dôs crôs. Sul ôr dal taront e cor cheste iscrizion: SIGILUM COMUNIS PORTVS LATISANE.

Profondiment

La Tiere de Tisane, feut dai Conts di Gurize dal secul XII, tal Cuatricent e jere passade sot dal domini di Vignesie. I Vendramins a jerin deventâts i proprietaris intal 1457. A promovevin la agriculture e a vevin introdot l'arlevament di une raze di cjavai pardabon biele. Il plui des jentradis a derivavin de riscossion dai dazis. Dopo Bortolomeo Vendramin al veve ereditât so fi Zaccaria, che tal 1528 al lassave dut il feut di Tisane ai trê fîs Nicola, Andrea e Zaccaria. Tal Cinccent tart, il feut al jere stât dividût tra lis fameis patriziis, che si davin adun intal Consorzi dai Jurisdicents. I Vendramins a àn lassât un segn evident de lôr presince midiant des lôr oparis di beneficence e di donazions testamentariis.

Il palaç, cul curtîl e l'ort, al ven comprât di Zaccaria Vendramin intal 1510. Al esisteve za intal 1528 e al veve, tal plan nobil, un salon grant che al deve su la place cuntune loze. Al ricjapave il scheme tradizionâl dal palaç venezian, cu la struture de façade dividude in trê e une schirie di viertiduris grandis inte part centrâl, in corispondence dal salon. Lis fotografiis storichis a mostrin tal centri dal plan nobil une cuadrifore cun arcs taronts. Su la colone de loze si tacavin lis ordenancis dai Jurisdicents e dal Cjapitani. Intal Sîscent, il cjast dal palaç si lu doprave tant che preson.

Intal Mai dal 1644, cul matrimoni tra Isabella Vendramin e Giacomo Contarini, il palaç al jere lât in dote ae famee nobile veneziane Contarini. Intal 1700 al jere de famee Benzon, dopo dal matrimoni tra Lucina Contarini e Pietro Benzon. A cheste ete a rimontin i stucs dal salon e altris restaurs. Intal 1810, Santina Renso-Taglialegne e veve comprât il palaç che po tal 1889 lu veve ereditât so fi Marzio e intal 1934 al deventave di proprietât di Peloso Gaspari. Al è stât distrut dai bombardaments de seconde vuere mondiâl; tal so puest al è stât costruît Palaç Trevisan. L'edifici, progjetât dal architet udinês Pietro Zanini, al rispiete la volumetrie dal palaç antîc.

Profondiment

Carlo Morossi al jere nassût a Tisane ai 5 di Fevrâr dal 1629. Jentrât intal Ordin dai fraris capucins minôrs a Conean tal 1646, al jere stât letôr di filosofie e teologjie, vicjari, vuardian, e superiôr de Provincie tal 1672, 1678 e 1684. Tal 1702 al jere deventât ministri gjenerâl dal Ordin. Al murì a Vignesie ai 4 di Zenâr dal 1713. So pari, Gasparo Morossi, al jere un marcjadant di legnam siôr. Tal 1659 al veve lassât intal testament une donazion par costruî l'altâr principâl de Glesie di S. Antoni di Padue (19) e il convent des muiniis dongje.

Il palaç, che vuê al da su la place Garibaldi, là che une volte al jere un ort, al rimonte al secul XVIII. Al à une façade lungje e elegante: sul as centrâl al è un portâl cul arc taront fat di bugnât slis. Parsore dal portâl e je une puarte barcon a trifore cun curnîs di piere e balustrade di fier batût. Subit parsore, tal mieç, e je la steme de famee nobile: un cjan molòs sot di un arbul. Tal ultin plan, in as, a son trê barcons plui piçui cuntune curnîs di piere. A man drete e a man çampe dal portâl, a son buteghis al plan tiere, e trê barcons tai plans superiôrs. Une façade dal edifici e cjale bande il flum Tiliment, chês altris si disvilupin tor dal curtîl centrâl.

Profondiment

L'edifici de Loze Publiche, o “Loggia del Comune di Sottopovolo”, al jere te beorcje che cumò e je tra vie Sottopovolo e vie Dietro Chiesa, dongje de Glesie di S. Zuan il Batist (16). Culì si picjavin i proclamis dal Cjapitani. Il tiermin “Sottopovolo” al significhe “sot dal pôl”, dal venit povolo, o ben pôl. Al ricuarde la usance che te Ete di Mieç a vevin i cjâfs di famee di dâsi adun sot di un pôl. Une volte, Sottopovolo al jere un Comun aministratîf rurâl distint dal Puart di Tisane. Al veve jurisdizion fûr dal Castrum, dulà che a vivevin i parons e i artesans (i Siôrs e i Artiscj). La vicinia e eleieve doi potestâts, che a nomenavin dîs abitants cul compit di sugjerî propuestis e proviodiments di someti ai cjâfs di famee.

Dal 1754 al 1779, si à fate cualchi funzion liturgjiche inte Loze par vie che te glesie di S. Zuan si jere daûr a fâ lavôrs. Tal periodi austriac, fin al 1897, l'edifici al jere la sede de Municipalitât. Te prime vuere mondiâl, i soldâts todescs a àn gjavât vie la campanele che e clamave dongje i cjâfs di famee. Tes fotografiis dal prin Nûfcent si viôt che l'edifici al veve tal plan tiere arcs taronts, e barcons tai doi plans superiôrs. Tal mieç dal templâr al jere un grant orloi. Te seconde vuere mondiâl la Loze e je stade une vore danezade: tal so puest al è stât costruît un altri edifici di trê plans.

Profondiment

La strade - clamade prime Via dell'Ospedale e dopo Via Cesare Battisti - vuê e à tornât a vê il so toponim antîc leât ae presince di une glesie dedicade a Sante Marie Anunziade. Volude de devozion popolâr, la glesie e jere stade fate sù te metât dal Sîscent cu la poie des fameis Gordino e Morossi. Salacor e jere stade dade ai francescans di Sabionere. Tal 1760 la glesie e veve un altâr di marmul, une pale de Beade Vergjine Anunziade e doi cuadris che a rafigurin la Ultime Cene e La mane che e ven jù dal Cîl. Intal 1861, Rosa de Egregis Gaspari le veve fate restaurâ e dopo le vevin consegnade aes muiniis Terziariis Francescanis, che a prestavin il lôr servizi di caritât tal ospedâl dai puars (Pio Ospitale dei Poveri), tacât dongje. La glesie le vevin disconsacrade tai prins agns dal Nûfcent e dopo de seconde vuere mondiâl le àn demolide.

Prime de grande vuere, la strade le clamavin Via dell'Ospedale pe presince dal Pio Ospitale, trasferît infin a Sabionere, tal 1912. Midiant di Luigi Gaspari, l'om di Rosa de Egregis, tal 1838 il Pio Ospitale dei Poveri lu vevin trasferît in Calle Annunziata, tal edifici tacât dal Oratori de Anunziade vieri. Tal Cinccent tart, il Pio Ospitale al jere dongje de Glesie di S. Zuan (16); par antîc, i malâts puars de Tiere di Tisane si ju ospitave prime intune cjase che e jere in place, e dopo intal piçul edifici adiacent ae Glesie de S. Crôs (38).

Profondiment

Te fin dal Votcent le disevin Piazza Maggiore, dopo Piazza XX Settembre, Piazza Roma e infin, dopo de seconde vuere mondiâl, Piazza Indipendenza. Il clap che al è tal mieç de place, screât tal 1911, al ripuarte i nons dai tisanots muarts tal Risorziment. Tal mieç de place, fin al 1776, e jere la Glesie de Sante Crôs (38) cun tacât l'Ospedâl dai Puars. La place si slungjave intune code, la plaçute, Piazzetta (48), che cumò e je Via del Battello. E jere tra Cà Benzon (47) e la Cjase Cappello (49), rivant fin al flum Tiliment.

I bombardaments de seconde vuere mondiâl a àn trasformât une vore il centri di Tisane: in particolâr, tra i edificis che no son plui al è Cà Benzon (47). Tal so puest al è stât tirât sù Palaç Trevisan cul progjet dal architet udinês Pietro Zanini. Tal 1998, la architete Gigetta Tamaro e à progjetât la pavimentazion e la iluminazion de place che a son presintis vuê.

Profondiment

Il Cjapitani governadôr al veve funzions aministrativis, judiziariis, di polizie e di difese militâr dal feut di Tisane. Par solit al jere un forest, dispès nobil e dotôr in leç. La sô cjarie e durave trê o cinc agns e dispès e jere riconfermade. I siei colaboradôrs a jerin: un Cancelîr, che in gjenar al jere un nodâr che al scriveve i ats e che al veve une cjase; un Cavalier e Officiali cul compit di polizie. Il Cjapitani al aministrave la justizie dôs voltis par setemane, il lunis e la joibe, massime lis causis civîls e criminâls. Al jere judât di doi judiçs popolârs, di doi proveditôrs pe sanitât, doi pes aghis, doi pe mangjative e un responsabil pes misuris militârs.

Al compens pal Cjapitani si zontavin une cjase cun cortivo e ort, lis Cavalcate, la Provision, e une part des jentradis che a rivavin dal paiament di multis e condanis. Ae fin dal Cinccent, cuant che il feut al jere passât al Consorzi dai Jurisdicents, i podês dal Cjapitani si jerin limitâts a ativitâts di control, a fâ meti in vore i decrets dâts fûr dal Consorzi, e a scuedi i dazis. Pe sô nomine, il Cjapitani al veve di prestâ un zurament solen di fedeltât ai jurisdicents, in glesie. A pro de popolazion, al controlave il presit dal pan, la cualitât de cjar, al podeve domandâ di impleâ oms par arestâ malvivents, sgjavâ fossâi, canâi o par meti a puest lis stradis.

Profondiment

Si fevele di une glesie dedicade a Sant Michêl, “Sante Micaelis de Latisanae”, tal 1518, in ocasion de visite pastorâl ae plêf di S. Zorç di Tisane dal Vicjari gjenerâl dal vescul Giovanni Argentino. Tai prins dal Nûfcent, si incarghe Girolamo D'Aronco di progjetâ une glesie gnove tal stes lûc di une plui antighe. Cjalant cualchi cartuline storiche, si viôt che la glesie dal Nûfcent e veve te façade un portâl cun protir, un grant roson parsore, e de bande çampe un portâl gotic di marmul, salacor dal secul XV, cuntune lunete che e rafigurave la Madone in tron cul Bambin e doi agnuluts.

Te prime vuere mondiâl la glesie e jere stade danezade: dopo de ricostruzion dal cuviert e dal restaur dai mûrs ruvinâts, e le àn tornade a consacrâ tal 1929. Ae fin, i bombardaments dal 1944-45 le àn distrute. Vuê no nus reste nuie de glesie di S. Michêl. Là che e jere, o ben in chê che cumò e je vie Don Bosco, par no dismenteâle, e par visâsi di ce dams teribii che e à fat la vuere, si è costruide une grande maine cun dentri la statue de Regina Pacis. Li dongje, e dilunc dal mûr che al è in bande, a son targhis celebrativis e monuments. La gnove Glesie di S. Michêl e je stade fate plui a Sud.

Profondiment

Il toponim Sabionere si riferìs a une zone cu la tiere pal plui savalonose e di colôr scûr, a Sud dal abitât di Tisane, dongje de rive dal Tiliment. Tal timp, pal fat di jessi dongje dal Puart, e je stade mete soredut dai barcjarûi, de int di passaç tra une spuinde e chê altre dal Tiliment, dai abitants di Tisane e des comunitâts dongje che a vignivin in pelegrinaç. Inte relazion de visite pastorâl dal Vescul di Udin Emanuele Lodi, tal 1821, al è scrit che la glesie e je stade fate sù tal 1578 de famee Mocenigo. Tal 1591 e je descrite tant che une glesie piçule, logade a mieze mie fûr di Tisane, cuntun sôl altâr di piere dedicât ae Concezion de Madone.

Par 130 agns, la storie de glesie e je stade leade a chê dal convent dongje dai fraris francescans minôrs, fondât tal 1638 dal frari Vincenzo Mocenigo. Il convent al è stât sierât te metât dal Sîscent e po al è stât dât ai Minôrs Conventuâi de Provincie di S. Antoni. Dopo de gnove viertidure, al à cressût di dimensions e di impuartance. Dopo di un incendi tal 1741, al è stât ricostruît tra il 1742 e il 1750. Tal 1769 la Republiche Venite lu à sierât e intal 1772 al è passât di proprietât a Antonio Milanese. Tal 1817 la famee Milanese e à donât la glesie ae parochie. Te prime vuere mondiâl i soldâts a dopravin la glesie tant che dormitori e in chê volte e à patît dams impuartants e robariis. Il cjampanili - fat sù te metât dal Votcent e ricostruît tal 1896 pal cediment dal teren - al è stât butât jù des trupis talianis tal 1917 e po ricostruît tra il 1925 e il 1926. Te seconde vuere mondiâl la glesie e à vût dams grâfs, riparâts tal Istât dal 1945.

A pet de ilustrazion di Banchieri, la façade de glesie e à un cuviert a capane. A flanc dal portâl, a son dôs barconadis cul arc taront. Parsore dal portâl e je la steme francescane, - cul braç di Crist che si incrose cun chel di Sant Francesc - e la steme dai Mocenigo. Plui adalt, tal mieç, e je une piçule ancone cuntune statue de Madone in tron cul Bambin. La statue origjinarie, robade te prime vuere mondiâl, e je stade sostituide cuntun altri rilêf di Francesco Ellero e Alessandro Pasini. Il sagrât e il puarti cul ingrès laterâl a son resints. L'interni al à dome une aule; la cuviertidure e à cjavai paladians e trê altârs. Di cheste glesie a jerin doi ex voto maritims dal secul XVIII a forme di barcje.

Profondiment

La Plêf di Tisane, tal 1180 e jere passade dal Patriarcjât di Aquilee a chel di Grau e tal 1456 sot de jurisdizion dal Patriarcjât di Vignesie. La glesie origjinarie e rimonte ae ete medievâl. Vue, fûr de glesie, dilunc de parêt setentrionâl, a son conservadis parts dal roson de façade, prime des trasformazions dal Cinccent. Par antîc e jere cognossude tant che “Glesie di Sant Zuan intal Puart”, stant che e deve propit sul puart. Tal 1504, midiant di Andrea Vendramin, si dave incarghe al architet Gaspare di Parme di miorâ la struture de glesie (“rinnovare, riparare e restaurare”). L'edifici gnûf, di forme romaniche rinassimentâl, al fo consacrât tal 1533. Al veve une façade a capane cuntun grant portâl tal mieç tra dôs monoforis cul arc taront, e un roson grant.

Tor il 1750 l'architet lombart Luca Andrioli al veve curade une altre ristruturazion: si jere ingrandît l'edifici e alçade di un plan la sagristie. Tal 1777 a vevin slungjade la abside di plui o mancul 2,5 metris. La plante di Antoni Banchieri le rafigure cemût che e jere tal Sietcent, cuant che e veve un stîl di ispirazion classiche cun elements barocs. Ancjemò vuê, cuatri lesenis jonichis poiadis suntun basament a dividin la façade. La part superiôr e à une trabeazion e un templâr semicircolâr racuardât cun doi elements a bovul. Plui in alt, a son dôs statuis di agnui, fatis tra il 1732 e il 1737. In bande dal portâl, dôs nicjis a contegnin lis statuis dal Sacri Cûr di Jesù e dal Sacri Cûr di Marie. La glesie, a navade uniche, e à trê capelis par bande, cun altârs di marmui policroms. Tal 1828, un cjampanili di modons, cul ferâl a bifore, al à sostituît une torisele di len. Il tor di vuê al è stât costruît dopo de prime vuere mondiâl, tra il 1922 e il 1923. Il ferâl dal cjampanili al à viertiduris "a serliana", cupule otagonâl e lanterne. Insom e je une crôs di fier batût alte 3 metris.

Dentri a son oparis impuartantis: il Batisim di Jesù, une piture a vueli su tele di Paolo Caliari, “il Veronese”: in principi, tal 1567, lu vevin metût parsore dal altâr maiôr, ma cumò al è li dal secont altâr a diestre; la Sacre Famee tra i Sants Blâs e Valentin di Giovanni Battista Grassi, dal 1568, che e je sul prin altâr a man çampe; la Trasfigurazion di Marco Moro, te abside, comissionade tal 1591. Il Batisim di Jesù lu vevin comissionât tal 1566. La composizion si ispire al Vanzeli di Sant Zuan. Jesù al è rapresentât cui voi bas, i braçs incrosâts sul pet, cui pîts dentri des aghis dal flum. Sant Zuan il Batist i è in bande: te man çampe al ten la scudiele pe aghe dal batisim. La man diestre e je alçade, e cui voi al cjale insù, di dulà che si difont la lûs dal Spiritussant. I rais luminôs a son cenglâts di dîs cjâfs di cherubins, intant che plui in alt e je daûr a mostrâsi la figure dal Pari. A viodi cheste sene a son: un agnul, dôs figuris a man drete e un grup di cuatri agnui a man çampe. Doi arbui frindôs a fasin di fonts.

Profondiment

I lavôrs di costruzion a jerin tacâts intal 1685 in gracie de ereditât lassade di Gasparo Morossi, un marcjadant di legnam siôr, pari dal frari francescan Agostin. Il convent, viert tal 1688, al jere stât dât aes muiniis Terziariis Francescanis. Tal 1733 lis religjosis a vevin domandât che il convent al deventàs di clausure. Tor de metât dal Sietcent la glesie e jere stade in part modificade. Dopo de ocupazion francese, tal 1810 il convent al ven sierât. Te prime vuere mondiâl i soldâts talians a vevin recuisît la glesie doprantle tant che dipuesit; tal 1918 e jere stade riconsacrade tant che glesie dai soldâts austroongjarês. La seconde vuere mondiâl e à fat dams al cuviert e ai barcons.

Tra la façade de glesie rafigurade di Antoni Banchieri e cemût che e je cumò no son tantis diferencis. La façade e je dividude di cuatri lesenis di ordin etrusc. Tal mieç al è un portâl di piere cun templâr; parsore e je la steme francescane (une crôs tra doi braçs incrosâts, un di Crist e che altri di Sant Francesc). In bande, tra lis lesenis, a son dôs nicjis pituradis e un barcon retangolâr. Parsore di un fregji alt a son cuatri lesenis che a insuazin, tal mieç, une viertidure circolâr e un templâr. Sul coronament, a son trê statuis di un scultôr venit dal Sietcent: a man çampe al è S. Francesc cu la crôs, a man drete, S. Antoni cul zi, e tal mieç, la Vergjine Imaculade.

Dentri de glesie, parsore dal altâr maiôr, e je une pale impuartante, dal 1730 cirche, che e rafigure la Sacre Famee, Sant Antoni di Padue e Sante Clare di Assisi. Salacor e je di Mattia Bortoloni, arlêf di Antonio Balestra e aiût di Zuan Batiste Tiepolo. Tal mieç, in bas, suntun nûl, al è Sant Josef. Al cjale la Vergjine Marie e il Bambin, adalt a çampe, intant che a man drete a son Sant Antoni di Padue e Sante Clare di Assisi. Intal côr, parsore de jentrade, e je une pale dal Cinccent tart che e mostre Sante Ane, la Madone cul Bambin, trê agostinians e il donadôr. La opare, che si pense che e sedi stade fate te buteghe di Jacopo Tintoretto cul fi Domenico, e ven de Glesie di S. Antoni Abât (21).

Profondiment

Il convent dai fraris agostinians al jere stât fondât par volê di Zaccaria Vendramin e de sô femine Clara Capello. La glesie e jere stade dade ai fraris agostinians tal 1490. Tal 1575 Elena Vendramin e veve disponût intal so testament di completâ inte Glesie di S. Antoni la capele grande cul altâr, e e domandave che si fasès un cuadri cu la figure de Madone cun Sante Ane pal altâr maiôr.

Tal 1651 la glesie e veve une struture semplice cun trê altârs, côr e sagristie. Il convent, al veve un claustri cui puartis su dôs bandis, la cort, l'ort, il zardin, la legnarie, la cantine, la dispense, il refetori, la stale, il granâr, il dormitori cun siet cjamaris; al è stât sierât tal 1769. Cualchi an dopo, lu vevin adiudicât a Antonio Gaspari e al jere doprât par ûs civîl. Il Senât di Vignesie al veve afidât la glesie ai Jurisdicents Pietro Priuli e Alvise Mocenigo tal Març dal 1773, e a vevin continuât a doprâle par ancjemò cualchi deceni. Tal 1806, dilunc de ocupazion francese, le vevin disconsacrade e ridote a dipuesit, e infin vendude ai Gaspari. Te Sierade dal 1917 un fûc al à brusât l'ex complès conventuâl. Vuê, la aree e je une vore diferente. L'edifici cui pilastris in modons e i sieraments di açâl vernisât di ros (za Veneto Banca, e cumò Banca Intesa Sanpaolo) al è stât costruît tra il 1954 e il 1956 sul progjet di Gino Valle.

Vuê, la pale votive che e rafigure S. Ane, la Madone cul Bambin, Trê Agostinians e il Donadôr e je inte glesie di S. Antoni di Padue (19). E je atribuide ae buteghe di Jacopo Tintoretto, judât dal fi Domenico. Inte part basse, S. Agostin Vescul, S. Antoni Abât e S. Nicolau di Tolentin a cjalin S. Ane e la Madone cul Bambin, cenglade di vot agnuluts. In bas a diestre, un om ritrat di profîl a mieze figure al à in bande la steme des fameis Vendramin e Moro. Un paisaç culinâr al fâs di fonts aes figuris.

Profondiment

La Glesie de Sante Crôs si cjatave tal mieç dal castrum medievâl dentri des muris. E je la glesie plui antighe di Tisane, adun cun chê di S. Zuan. Ai 30 di Lui dal 1310 un decret dal Consei Maiôr di Vignesie al deve al Cont di Gurize il permès di impuartâ a Tisane il materiâl pe sô costruzion. Ai 16 di Otubar dal 1368, in cheste glesie, il popul di Tisane al à zurât fedeltât a Mainart Cont di Gurize.

E jere intitulade ae “Sante Crôs” par vie de presince de relicuie dal len de Crôs Sante dal Signôr, e salacor ancje pal rituâl che al precedeve lis partencis dai pelegrins e dai crosâts viers la Tiere Sante. In bande al jere logât il cjampanili, cuntune bifore te part plui alte, costruît tor il 1460. La glesie e veve doi altârs: un dedicât al Santissim Rosari, e un ae Madone, venerade dal popul tant che “Madona Vechia”. Tal 1774, la glesie e je stade disconsacrade pal fat che il patriarcje venezian Zuan IV Bragadin no le calcolave adate par chel puest (“superflua e indecorosa”). Lis relicuiis lis vevin trasferidis te Glesie di S. Antoni Abât. Invezit, l'Ospedâl dai Puars che al jere tacât, lu vevin trasferît dongje de Glesie di S. Zuan il Batist.

Cu la demolizion de Glesie de Sante Crôs si è pierdût un tassel impuartant de storie di Tisane. Tal an 2000, dilunc dai lavôrs di ricostruzion de pavimentazion di place Indipendenza, si son cjatâts rescj dai mûrs de glesie. Si conte che Dante Alighieri, intal so viaç bande il confin orientâl, invidât patriarcje di Aquilee Paian de Tor, al sedi passât pes tieris dal Friûl doprant viis di aghe. Nol è cussì improbabil che al sedi rivât tal Puart di Tisane e che al vedi viodude la Glesie de Sante Crôs. Dut câs, no vin documents che lu confermin.

Profondiment

Si fevele di un pas pes barcjis intal document di division dal feut di Tisane tra i fradis Andrea, Nicolò e Zaccaria Vendramin, tal 1528. La gjestion dal pas e jere apaltade cuntun capitolât che al fissave lis tarifis di passaç par personis, animâi e marcjanziis. La tarife e cresseve fin cuasi a dopleâsi tal câs che il flum al fos in plene. I Vendramins e i lôr massârs a vevin acès libar cun cualsisedi cjame.

I abitants a vevin di proviodi ae manutenzion dal Pas. Lis penis a jerin severis par chei che a danezavin la struture, o che a traviersavin il flum intun altri pont, o pûr che si fasevin passâ pal passador, o che no paiavin, o infin che a lassavin scjampâ vie la barcje. Si podeve sleâ la cuarde dome se la imbarcazion e superave dimensions determinadis, intant che chês plui piçulis a passavin sot. Tra la Plaçute (48), e Palaç Mocenigo (3) fin al secont dopovuere al è stât ancjemò atîf un pas secondari, doprât soredut de int di S. Michêl par podê rivâ tal marcjât setemanâl di Tisane. Il traghet “Borghello”, mieç antîc di comunicazion tra lis dôs rivis, al è restât atîf fin ae costruzion dal puint sul flum Tiliment.

Profondiment

Il flum Tiliment, atestât tal 70 d.d.C. cirche, al è citât di Plini tant che Tiliaventum Maius Minusque. Vuê al è un dai flums europeans rârs che al manten ancjemò la sô morfologjie origjinarie. Il so non al derive dal celtic telia, e dal latin tilia “tei”, che al vûl dî “flum plen di teis”. Vuê o viodìn il branc minôr, stant che chel maiôr nol è plui. Une volte, lu navigavin cun facilitât ancje imbarcazions di grandece medie e al jere une strade fondamentâl pal cumierç des materiis primis scambiadis tra la Republiche Venite e i Paîs che a son di là des Alps.

A Tisane si jere disvilupât un puart comerciâl florit, documentât tal 1226. La sô impuartance e je confermade de coniazion di une monede fate a pueste, o ben il denâr ingjavât di arint. Tal prin plan dal Municipi si pues viodi un dai dîs esemplârs restâts, che al è stât donât de Crédit Agricole FriulaAdria al Comun di Tisane tal 2021. Te bande drete al è rapresentât il patriarcje sentât te sente vescovîl, cu la scrite "+PORTVTESANA" (puart di Tisane); de bande ledrose al è stilizât un templi cun arcs e colonis. Dal puart a passavin lis marcjanziis plui svariadis: sâl, ram, stagn, lin e lane, savon, fier de Stirie e de Carinzie, prodots agricui furlans e istrians, ma soredut legnam par costruî, diret a Vignesie. Troncs, trâfs e breis a rivavin su çatis vuidadis di çatârs abii. Pes operazions di caric e di scaric, che a jerin regolamentadis, si veve di paiâ un dazi. Lis robariis e il cuintribant a jerin frecuents.

Dopo dai Vendramins, il puart al à pierdût impuartance, ancje par pal fat che il fondâl si è alçât. Lis funzions si limitavin a operazions di piçul cabotaç costîr, lagunâr e fluviâl. Lis ativitâts portuâls a son finidis dal dut tor de metât dal Votcent. Il traspuart fluviâl dal legnam che al vignive jù de Cjargne al à continuât fin tai prins agns dal Nûfcent. Si passave di une rive a di chê altre midiant di un pas principâl (6) e di un pas secondari, doprât fin tal secont dopovuere. Tai agns a son stâts fats plui e plui intervents par mantignî lis rostis e par meti in sigurece l'abitât cun barieris palificadis. I arzins, ricostruîts plui voltis, a son stâts rialçâts cun oparis di ciment dopo des aluvions dal 1965 e dal 1966. A Tisane, il prin puint di len sul Tiliment par fâ passâ i cjars al jere stât fat intal 1873, e dopo sostituît cuntun puint di fier intal 1913. Chest chi, e il puint de ferovie, a àn vût dams impuartants dilunc des dôs vueris, e a son stâts ricostruîts.

Profondiment

Un rilêf de Braide dite Brolo in Rocca di Cà Capello di Antonio Antonelli dal 1746 al descrîf lis cjasis, l'ort, l'ortesello, i moreri e la boaria cuntune struture cun puartis plui sempliçs a pet de rapresentazion di Banchieri. Fin dal principi dal secul XVI, in cheste zone e jere la Roche, o ben une tor che di cheste vuê nus reste dome il non de strade che e puarte di place Indipendenza fin al Parc Gaspari. Antonelli al ripuarte il fuart dal secul XIV cu la scrite Loco ove era il Castello di Rocca ora Cà Capello.

La vile, passade dopo di proprietât ae Famee Gaspari, intal so grant parc arborât e ospitave dispès concors di cjavai. E je stade danezade te prime vuere mondiâl e cu lis aluvions dal flum Tiliment tal 1965 e 1966. Deventade aromai inagjibile, ae fin le àn demolide. Vuê e reste dome une part dal parc.

Profondiment

Intal rilêf di Antoni Antonelli dal 1746, che al rapresente la Braida detta Brolo in Rocca di Cà Capello, l'edifici al è segnât tant che Canevon di Cà Capello. Al confinave cul convent e la glesie di S. Antoni di Padue (19).

La economie dal feut di Tisane e dipendeve massime de agriculture, dal arlevament e dal cumierç vie flum. Dispès il vin al jere doprât tant che marcjanzie di scambi pal legnam, destinât soredut a Vignesie. Il vin, cul formadi e i cereâi, al faseve part de mangjative che i marcjadants a ufrivin, o pûr al costituive une part dal paiament. Duncje, chei che a produsevin vin e forment inte lôr proprietât a vevin vantaçs. Il vin al jere vendût a nivel locâl e al jere un dai prodots principâi espuartâts cui cjars intai teritoris imperiâi. Si comprave il vin neri locâl e il “vin bianco foresto” o “vin bianco navigato” che al vignive des Marcjis, plui cjâr e innomenât.

Profondiment

Il tiermin osteria al derive dal latin hospite e al riclame la funzion de ospitalitât. Salacor al jere un puest par polsâ, dulà che nol podeve mancjâ il vin e là che si podeve passâ la gnot. Par une prudence cautelative, i forescj a vevin l'oblic di durmî almancul trê dîs inte ostarie prime di podê passâ la gnot in cjasis privadis. L'edifici - li che vuê si incrosin place Garibaldi e vie Sottopovolo - al veve di jessi un lûc di passaç, un puest par cjatâsi. Te façade de ostarie (Casa dell'Hosteria) si esponevin i condanâts ae berline publiche.

Une volte, si paiavin dazis pal passaç des marcjanziis sul flum, ma a jerin ancje tancj dazis locâi, e tra chescj chei de Ostarie. Un document dal Mai dal 1578 al ripuarte che il Dacio dell'Hosteria al jere stât stabilît par 108 ducâts anuâi, cul oblic di no “farsi dar più di soldi sedici per persona, che mangia a pasto, e di stallazo soldi sei per ogni capo di animale tra il giorno et la notte”. Buteghîrs e marcjadants a vevin di jessi in regule cul paiament dai dazis, cui Pês e cu lis Misuris, verificâts di doi Zurâts.